Health Insurance Co-Payment in Marathi | हेल्थ इन्शुरन्स हा आपल्या आरोग्याचा तसेच पैशांचा सुरक्षा कवच आहे.
पण या कवचात काही “क्लॉज” असतात जे समजून न घेतल्यास तुम्हाला आर्थिक नुकसान होवू शकते. त्यापैकी एक महत्त्वाचा क्लॉज म्हणजे को-पेमेंट.
चला, हा क्लॉज सोप्या उदाहरणातून समजून घेऊयात.
को-पेमेंट म्हणजे काय?
साध्या भाषेत: “तुम्ही काही पैसे, इन्शुरन्स कंपनी काही पैसै”.
म्हणजे, हॉस्पिटल बिल येईल तेव्हा त्यातील एक भाग तुम्ही स्वतः द्याल आणि उरलेला भाग इन्शुरन्स कंपनी देईल.
उदाहरणार्थ, जर तुमच्या पॉलिसीमध्ये २०% को-पेमेंट असेल, तर १ लाख रुपयांच्या बिलात तुम्ही २०,००० रुपये द्याल, कंपनी ८०,००० रुपये भरेल.
लहान बचत, मोठ नुकसान?
समजा, राहुलने ५ लाख कव्हर असलेली हेल्थ पॉलिसी ७,००० रुपयांत घेतली. एजंटने सुचवलं, “को-पेमेंट क्लॉज घ्या, प्रीमियम १,८०० रुपये कमी होईल!” राहुलला ही ऑफर आवडली. त्याने २०% को-पेमेंटसह पॉलिसी घेतली.
काही महिन्यांत राहुलचा अपघात झाला. हॉस्पिटल बिल आलं २ लाख रुपये. इन्शुरन्स कंपनीने ८०% (१.६ लाख) भरले, पण ४०,००० रुपये राहुलला स्वतः द्यावे लागले!
साधं गणित समजा:
- प्रीमियममधील वार्षिक बचत = १,८०० रुपये
- एका क्लेमवर झालेला खर्च = ४०,००० रुपये
- हा खर्च भरून काढण्यासाठी लागणारी वर्षे = ४०,००० / १,८०० ≈ २२ वर्षे!
म्हणजेच, १८०० रुपये बचत करण्यासाठी राहुलने एका वेळी २२ वर्षांची बचत गमावली!
को-पेमेंट कधी अनिवार्य असतं?
काही परिस्थितीत इन्शुरन्स कंपन्या को-पेमेंट लावतात:
- आजारपणाचा इतिहास असल्यास: जर तुम्हाला डायबिटीज, हार्ट प्रॉब्लम सारख्या आजारांसाठी वारंवार उपचार लागत असतील, तर कंपनी तुमची रिस्क कमी करण्यासाठी को-पेमेंट लावते.
- वय जास्त असल्यास: ६०+ वयोगटातील लोकांवर कंपनी १०-२०% को-पेमेंट लावू शकते.
- नेटवर्क हॉस्पिटलबाहेर उपचार घेतल्यास: कॅशलेस क्लेम न घेता तुम्हाला २०-३०% बिल स्वतः भरावे लागेल.
को-पेमेंटचे फायदे कोणत्या वेळी?
प्रीमियम कमी हवं असेल: जर तुमच्या हेल्थ इन्शुरन्स पॉलिसीमध्ये प्रिमियम कमी करायचे असेल, तर को-पेमेंट पर्याय निवडा. पण लक्षात ठेवा: आणीबाणीत जास्त पैसे द्यावे लागतील.
वृद्ध कुटुंबीयांसाठी: जर घरातील वडिलधाऱ्यांना पॉलिसी घ्यायची असेल आणि प्रीमियम खूप जास्त असेल, तर को-पेमेंटसह पॉलिसी घेऊन प्रीमियम कमी करता येते.
निष्कर्ष
को-पेमेंटचा “लोभ” टाळा.
जर तुम्ही तरुण आणि निरोगी असाल, तर को-पेमेंट नसलेली पॉलिसी निवडा.
आणि को पेमेंट घेत असाल तर नेहमीच:
- को-पेमेंटची टक्केवारी किती आहे?
- ती अनिवार्य आहे का?
- नेटवर्क हॉस्पिटल्स कोणती?
- याची पूर्ण माहिती घ्या.
लक्षात ठेवा: आरोग्यासारखी मौल्यवान गोष्ट सुरक्षित ठेवण्यासाठी, “सवलतीच्या” पॉलिसीपेक्षा “सुरक्षित” पॉलिसी निवडलेली कधीही बेस्ट.
पोस्ट वाचा: स्वतःसाठी बेस्ट हेल्थ इन्शुरन्स पॉलिसी कशी निवडायची? – एक प्रॅक्टिकल गाइड
पोस्ट वाचा: Health Insurance | आरोग्य विमा पॉलिसी Renew न करणे पडेल महागात!
