Term Insurance in Marathi | कुटुंबाच्या आर्थिक सुरक्षिततेसाठी टर्म इन्शुरन्स हा एक महत्त्वाचा पाया आहे. पण “किती कव्हर घ्यावे?” हा प्रश्न अनेकांना गोंधळात टाकतो.
चला, सोप्या पद्धतीने समजून घेऊया.
स्टेप 1: तुमच्या “देण्याच्या” बाबी ओळखा
टर्म इन्शुरन्सची रक्कम ठरवताना सर्वप्रथम तुमच्या सर्व आर्थिक जबाबदाऱ्या (Liabilities) बेरीज करा. यात तीन गोष्टी समाविष्ट करा:
1) कुटुंबाचा मासिक खर्च:
भाडे, अन्नपाणी, बिले, शाळा-कॉलेज फी, इत्यादी सर्व नियमित खर्चाची एकूण रक्कम काढा.
उदाहरणार्थ, जर महिन्याचा खर्च ₹५०,००० असेल, तर वार्षिक खर्च ₹६ लाख होतो. ही रक्कम ३% वार्षिक व्याजदराने गुंतवली तर कुटुंबाला नियमित उत्पन्न मिळेल.
म्हणजे, ₹६ लाख ÷ ३% = ₹२ कोटी ही रक्कम तुमच्या कव्हरमध्ये समाविष्ट करावी.
2) भविष्यातील मोठ्या खर्चाचा अंदाज घ्या
मुलांचे उच्च शिक्षण, लग्न, किंवा व्यवसायासाठीची रक्कम विचारात घ्या. उदा., ₹५० लाख घेऊ. (नंतर आपण एक गणित करू म्हणून हे आकडे उहादरण म्हणून घेत आहोत)
3) सद्याची काही कर्जे असतील तर ते मोजा:
होम, कार लोन, क्रेडिट कार्ड बाकी, इत्यादी सर्व कर्जे जोडा. उदा., ₹३० लाख घेऊ.
स्टेप 2: तुमच्या “मालकीच्या” बाबी वजा करा
आता तुमच्या सद्याच्या बचत आणि मालमत्तेचे (Assets) मोजमाप करा. पण लक्षात ठेवा: प्रत्येक मालमत्ता तितकी “लिक्विड” (सहज रोखीत येणारी) नसते. उदाहरणार्थ,
- रोख, FD, बचत: यांना १००% मोजा. कारण पटकन पैसे काढता येतात. उदा., ₹१० लाख घेऊ.
- शेअर, म्युच्युअल फंड: फक्त ५०% मोजा (रिस्कमुळे) आणि किंमत कमी जास्त होत असते. उदा., ₹५ लाख घेऊ.
- घर, जमीन: यांना ०% माना (लवकर विकणे शक्य नाही).
- एकूण “मालकी” = ₹१० लाख + ₹५ लाख = ₹१५ लाख.
टर्म इन्शुरन्स कव्हर रक्कम काढण्याचे सूत्र:
टर्म इन्शुरन्स कव्हर = (मासिक खर्चाची रक्कम + भविष्यातील खर्च + कर्जे) – मालकी
वरील उदाहरणाप्रमाणे: (₹२ कोटी + ₹५० लाख + ₹३० लाख) – ₹१५ लाख = ₹२.६५ कोटी.
महागाईचा विचार का करावा?
आज ₹२.६५ कोटी पुरेसे वाटतात, पण २० वर्षांनंतर महागाईमुळे ही रक्कम अपुरी पडू शकते. त्यासाठी दोन पर्याय आहेत:
- सध्याच्या कव्हरला २.५ किंवा ३ ने गुणा. उदा., ₹२.६५ कोटी × ३ = ₹७.९५ कोटी.
- इन्शुरन्समध्ये “इन्क्रिझिंग कव्हर” ऑप्शन निवडा, ज्यामध्ये कव्हर रक्कम दरवर्षी ५-१०% वाढते.
योग्य कव्हर निवडण्याचे फायदे
- कुटुंबाच्या दैनंदिन गरजा पूर्ण होतात.
- मुलांचे भविष्य सुरक्षित राहते.
- कर्जाचा ताण कुटुंबावर येत नाही.
- प्रीमियम कमी ठेवूनही पुरेसे कव्हर मिळते.
काही महत्त्वाच्या टिप्स
- कव्हर निवडताना “महागाई” आणि “जीवनातील बदल” (उदा., नवीन कर्ज, बाळाचा जन्म) विचारात घ्या.
- दर ५ वर्षांनी कव्हर रिव्यू करा.
- इन्शुरन्स एजंट किंवा फायनान्शियल प्लॅनरशी सल्ला जरूर घ्या.
निष्कर्ष:
टर्म इन्शुरन्स हा केवळ एक कागद नसून, कुटुंबाच्या सुरक्षिततेचा आधारस्तंभ आहे.
वरील पद्धतीने तुम्ही तुमची टर्म इन्शुरेंस कव्हर रक्कम अचूक काढू शकता.
लक्षात ठेवा: एक योग्य टर्म इन्शुरेंस प्लान म्हणजे तुम्ही नसताना फॅमिलीची आर्थिक सुरक्षा.
पोस्ट वाचा: Term Insurance | टर्म इन्शुरन्स पॉलिसी घेताना कोणते रायडर्स निवडावे?
पोस्ट वाचा: Health Insurance | हेल्थ इन्शुरन्स को-पेमेंट म्हणजे काय?
