Health Insurance in Marathi | कल्पना करा, एक दिवस अचानक तुम्हाला हृदयविकाराचा झटका येतो किंवा तुमच्या मुलाला गंभीर आजार होतो.
अशा वेळी डॉक्टर, दवाखाना, औषधे यांचा खर्च हजारो-लाख रुपये होऊ शकतो. हा खर्च भागवण्यासाठी तुमची बचत पुरेशी आहे का?
जर नाही, तर आरोग्य विमा हाच तुमचा खरा तारणहार ठरू शकतो. या आर्टिकलमध्ये आरोग्य विम्याची सर्व महत्त्वाची माहिती सोप्या मराठीत समजून घेऊया.
आरोग्य विमा म्हणजे नक्की काय?
आरोग्य विमा हा एक करार (पॉलिसी) असतो, ज्यामध्ये विमा कंपनी तुमच्या वैद्यकीय खर्चाची जबाबदारी घेते. याबदल्यात तुम्ही त्यांना वार्षिक प्रीमियम (रक्कम) भरता.
उदाहरणार्थ, जर तुम्ही ५ लाख रुपयांचा विमा घेतला आणि हॉस्पिटलमध्ये ३ लाख रुपये खर्च आला, तर विमा कंपनी हा खर्च भरते. अशाप्रकारे, तुम्ही आजारपणाच्या वेळी आर्थिकदृष्ट्या सुरक्षित राहू शकता.
आरोग्य विम्याचे प्रकार कोणते?
१. वैयक्तिक विमा (Individual Health Insurance):
- फक्त एका व्यक्तीसाठी. उदा., तुमच्या स्वत:च्या आजारपणासाठी.
- प्रीमियम स्वस्त, विशेषतः तरुण आणि निरोगी व्यक्तींसाठी.
२. फॅमिली फ्लोटर विमा (Family Floater):
- संपूर्ण कुटुंबासाठी (पती-पत्नी, मुले, पालक).
- सर्वांसाठी एकच कव्हर (उदा., १० लाख), पण प्रीमियम वय आणि आरोग्यावर अवलंबून.
३. वृद्धांसाठी विमा (Senior Citizen Plan):
- ६० वर्षांवरील व्यक्तींसाठी.
- डायबिटीज, हृदयरोग यांसारख्या वयाच्या आजारांना कव्हर.
४. गंभीर आजार विमा (Critical Illness):
- कॅन्सर, किडनी फेल्युर, पक्षाघात यांसारख्या २०+ आजारांसाठी.
- एकमुखी रक्कम (लम्प सम) मिळते. उदा., १० लाख रुपये.
५. मातृत्व विमा (Maternity Insurance):
- गर्भधारणेपासून बाळाच्या जन्मापर्यंतचा खर्च.
- डिलिव्हरी, सिझेरियन, बाळाचे टीकाकरण यासाठी.
६. ग्रुप विमा (Group Insurance):
- कंपन्या त्यांच्या कर्मचाऱ्यांसाठी घेतात.
- स्वस्त, पण नोकरी सोडल्यास कव्हर संपते.
७. टॉप-अप/सुपर टॉप-अप:
- मूळ विमा संपल्यावर अतिरिक्त कव्हर. उदा., ५ लाख मूळ + ५ लाख टॉप-अप.
आरोग्य विमा का घ्यावा? ५ महत्त्वाची कारणे
१. वैद्यकीय महागाई: दवाखान्यांचे खर्च दरवर्षी १५% वाढतात. २०३० पर्यंत हार्ट सर्जरीची किंमत ५ लाखांपेक्षा जास्त होईल असा अंदाज आहे.
२. कुटुंबाची सुरक्षा: एकट्या कमावणाऱ्या व्यक्तीच्या आजारपणात कुटुंबाचा खर्च कोण भरेल? म्हणून आरोग्य विमा असावा.
३. कर बचत: विम्यावरील प्रीमियमवर ५०,००० रुपये पर्यंत कर सूट (सेक्शन 80D).
४. कॅशलेस उपचार: विमा कंपनीच्या नेटवर्क हॉस्पिटलमध्ये भरती झालात तर तुमच्या खिशातून पैसे द्यावे लागत नाहीत. (तसंही आजकाल सगळ्या हॉस्पिटलमध्ये कॅशलेस उपचार होतात)
५. मानसिक शांती: “पैसे नसल्यामुळे उपचार थांबवावे लागतील” या चिंतेपासून मुक्तता.
योग्य आरोग्य विमा पॉलिसी निवडण्यासाठी ५ टिप्स
१. कव्हरची रक्कम: किमान ५ लाख (शहरी भागात कमीत कमी १० लाख).
२. रूम रेंट लिमिट: हॉस्पिटलमध्ये कोणतीही खोली घेऊ शकता. त्यावर कोणतीही लिमिट नको.
३. प्री-आणि पोस्ट-हॉस्पिटलायझेशन: उपचारापूर्वी ३० दिवस आणि नंतर ६० दिवसांचा खर्च समावेश असला पाहिजे.
४. नॉन-मेडिकल खर्च: एम्ब्युलन्स, नर्सिंग चार्जेस कव्हर होतात का? हे चेक करा.
५. क्लेम सेटलमेंट रेशो: ९०% पेक्षा जास्त असलेली विमा कंपनी निवडा.
आरोग्य विमा घेताना कोणत्या गोष्टी टाळाव्यात?
आजार लपवू नका: विमा पॉलिसी घेताना कोणतेही आजार लपवू नका. जे आहे ते खर खर सांगा.
सब-लिमिट्स: प्रत्येक खर्चासाठी स्वतंत्र मर्यादा नको. उदा., शस्त्रक्रियेसाठी १ लाख, डायग्नोस्टिक्ससाठी १०,०००. लिमिट यासाठी नको कारण लिमिटच्या वरती खर्च झाला तर तुम्हाला भरावा लागेल.
दारू आणि तंबाखू: प्रीमियमचे थोडे पैसे वाचवण्यासाठी अनेक जण दारू आणि तंबाखू खात नाही अस विमा पॉलिसी काढताना संगतात. तुम्ही अस करू नका. दारू पितो तर पितो. तंबाखू खातो तर खातो.
आरोग्य विमा पॉलिसीचा क्लेम कसा मिळवायचा?
१. कॅशलेस: विमा कंपनीच्या नेटवर्क हॉस्पिटलमध्ये विमा कार्ड दाखवा जे तुम्हाला विमा कंपनीकडून दिल जात. ते नसेल तर पॉलिसी डॉक्युमेंट देऊ शकता.
२. रिम्बर्समेंट: अशा हॉस्पिटलमध्ये भरती झालात जिथे कॅशलेसची सुविधा नाही तर प्रथम तुम्ही खर्च भरा, नंतर बिले सबमिट करून पैसे परत मिळवा.
३. आवश्यक कागदपत्रे: हॉस्पिटल डिस्चार्ज स्लिप, मेडिकल बिले, डॉक्टरचे प्रिस्क्रिप्शन सगळ काही नीट सांभाळून ठेवा.
समजा, आरोग्य विमा नाही घेतला तर…
- कल्पना करा. ५ लाख रुपयांच्या हार्ट सर्जरीसाठी तुम्हाला FD तोडावी लागेल किंवा म्यूचुअल फंड विकावे लागतील.
- सेव्हिंग्ज संपल्यास कर्ज घ्यावे लागेल, ज्यावर व्याज द्यावे लागेल.
- मुलांच्या शिक्षणासाठीचे फंड ठेवलेत ते धोक्यात येतील.
- म्यूचुअल फंड असो की इतर काही गुंतवणूक पुन्हा 0 पासून सुरुवात करणे कठीण. कारण तुमचा मौल्यवान वेळ निघून गेलेला असतो.
निष्कर्ष
आरोग्य विमा हा “खर्च” नव्हे, तर “आरोग्यासाठी केलेली गुंतवणूक” आहे.
आज ५००-१००० रुपये मासिक प्रीमियम भरून, तुम्ही लाखो रुपयांच्या संकटापासून कुटुंबाला वाचवू शकता. त्यामुळे उद्याची चिंता सोडा, आजच योग्य विमा पॉलिसी काढा!
लक्षात ठेवा: “निरोगी आहात” म्हणून विमा नाकारू नका. अपघात किंवा आजार कोणत्या वयात येईल कोणास ठाऊक!
पोस्ट वाचा: Money Management | तुमचे पैसे दोन मार्गांनी वापरू शकता पण कोणता मार्ग योग्य आहे?
पोस्ट वाचा: Large Cap Mutual Fund | लार्ज कॅप म्युच्युअल फंड म्हणजे काय? सोप्या शब्दात समजून घ्या!
पोस्ट वाचा: Money Management | पगाराचे ३ प्रकार आणि कोणता मार्ग संपत्तीकडे नेतो?
